समाज भयावह हुनुमा जति खराब आचरणको भूमिका हुन्छ, त्यसभन्दा बढी विद्वान्हरूको तटस्थता जिम्मेवार हुन्छ

    एउटा ओलीरूपी प्रवृत्तिको पतन र अर्को उस्तै प्रवृत्तिको पुनरोदयका लागि लामो समयदेखि चलिरहेको सत्ताको फोहोरी खेल हेर्न हामी विवश छौँ । सरकार, व्यवस्था, सत्तालिप्सा एवं समसामयिक आर्थिक–राजनीतिक–सांस्कृतिक–सामाजिक सवालहरूमा प्रश्न गर्ने प्रश्नकर्ता स्वयं पनि प्रश्नहरूको कठघरामा उभिनु आवश्यक छ । जब प्रश्नहरू स्वयं विचार र बहसको बाटो हुँदै प्रश्नहरूकै कसौटीबाट गुज्रिन्छन्, तब ताजा र नवीन विचारको अभ्युदय हुन पुग्छ । लामो समयदेखि एउटै लय र रफ्तारमा हिँडेको बौद्धिकताको सिलसिलामा क्रमभंगता ल्याउन सक्ने आन्दोलन र बौद्धिक गतिविधिमा संलग्न बौद्धिक तप्कालाई समेत जायज सवालहरूको कठघरामा उभ्याएर हस्तक्षेपकारी भूमिका निर्वाह गर्न सक्ने नयाँ पुस्ताको उदय अब बौद्धिक स्पेसमा अत्यावश्यक भइसकेको छ ।